Escolma de textos de Pedro Fresneda

Os textos de Pedro Fresneda son inseparables das propostas escénicas que os acompañaron, son reflexións, pensamentos, conflitos, instintos, desexos, preguntas, protestas, berros e silencios.

Nacen da observación dos acontecementos e das sociedades contemporáneas que os acompañan e das conversas, da incomprensión e de tentar explicarse para ver se desta forma, poñéndoo fóra, primeiro a través da palabra escrita e despois convertido en acto escénico, se pode nomear.

Estes cinco textos escollidos para a súa tradución ao galego por Avelina Pérez e Afonso Becerra, compoñen un percorrido preciso do colectivo ao que acompañan, arroupan e dan sentido, coma cando ao escalar unha montaña decides unha vía pola que rubir e na súa traxectoria deixas ancoraxes para asegurar certos puntos e non caer, se fose o caso, excesivamente lonxe do último punto asegurado.